Fjórtán ára piltur drukknaði

Folderøy-vatnið í Bømlo er um það bil miðja vegu milli …
Folderøy-vatnið í Bømlo er um það bil miðja vegu milli Bergen og Haugesund á vesturströnd Noregs. Kort/Google Maps

Fjórtán ára gamall piltur drukknaði af slysförum í Folderøy-vatni í Bømlo í Vestlandet-fylki í Noregi í dag. Var drengurinn með þremur félögum sínum við sundiðkun í vatninu þegar hann hvarf þeim skyndilega sjónum.

Leituðu drengirnir vinar síns en gáfust fljótlega upp og höfðu samband við lögreglu klukkan 13:05 að norskum tíma. Voru viðbragðsaðilar þegar kallaðir út, sjúkraþyrla lagði af stað frá Bergen og Sea King-björgunarþyrla frá flugvellinum í Sola við Stavanger auk þess sem lögregla og slökkvilið með kafara héldu á vettvang.

29. drukknunin í ár

Það voru kafarar slökkviliðsins sem fundu piltinn, klukkustundu eftir að lögreglu barst tilkynning frá félögum hans. Var honum þegar komið í land þar sem sjúkraflutningafólk hóf lífgunartilraunir. Þær báru ekki árangur og var drengurinn úrskurðaður látinn um klukkan 14:30.

Að sögn Victors Fenne-Jensen, aðgerðastjóra suðvesturumdæmis lögreglunnar, unnu lögreglumenn enn að vettvangsrannsókn klukkan 16 og ræddu við vitni.

Slysið í dag er 29. drukknunin í Noregi á árinu en fórnarlambið í dag það yngsta, öll hin voru 20 ára eða eldri og 26 þeirra karlmenn. Í fyrra drukknuðu 86 manns í Noregi sem er fækkun um 16 prósent frá þeim 102 sem drukknuðu árið 2018. Fullorðnir karlmenn eru í yfirgnæfandi meirihluta, 85 prósent þeirra sem drukknuðu í fyrra, enda líklegastir til að vera einir á ferð á tómstundabátum.

NRK

VG

Aftenposten

mbl.is