Stærsti öfgahægriflokkur Þýskalands, AfD, hefur sagt upp störfum talsmanni flokksins til fleiri ára, eftir að greint var frá því í fjölmiðlum í Þýskalandi að talsmaðurinn hafði viðrað þær hugmyndir sínar að skjóta eða senda í gasklefa flóttafólk sem kemur til Þýskalands.
Talsmaðurinn, Christian Lueth, lét ummælin falla í samtali sem var tekið upp. Honum var sagt upp störfum í dag og tekur uppsögnin gildi án tafar.
Í samtali við hægrisinnaðan blaðamann í febrúar sagði Lueth að það kæmi sér vel fyrir AfD ef fleira flóttafólk fengi alþjóðlega vernd á Þýskalandi. Það myndi auka stuðning við flokkinn að mati Lueth.
„Við getum enn þá skotið þau öll til bana eftir á. Það er ekki vandamálið. Eða sent þau í gasklefann, hvernig sem við viljum. Mér er sama,“ segir Lueth á upptökunni. „Því verr sem Þýskalandi gengur, því betra fyrir AfD,“ sagði Lueth.
Lueth fór í launað leyfi síðasta vor eftir að hann lýsti því opinberlega yfir að hann væri fasisti og dásamaði „arískan“ afa sinn.