Chad Wolf, starfandi ráðherra heimavarnarráðuneytis Bandaríkjanna, hefur sagt af sér embætti á sama tíma og miklar áhyggjur hafa verið uppi um áframhaldandi ofbeldi í landinu við innsetningarathöfn Joes Bidens, verðandi forseta Bandaríkjanna, í næstu viku.
Embættismaður í ráðuneytinu staðfesti þetta við AFP-fréttastofuna.
Heimavarnarráðuneytið fer með öryggismál við athöfnina.
Wolf gaf enga ástæðu upp fyrir afsögninni en sagði að Pete Gaynor, framkvæmdastjóri almannavarnastofnunarinnar FEMA, myndi taka við af sér.
Áður höfðu bæði mennta og samgönguráðherra sagt af sér en þær tilkynntu afsögn sína í kjölfar innrásarinnar inn í þinghúsið.
Ráðherra samgöngumála, Elaine Chao, tilkynnti afsögn sína á miðvikudag vegna ofbeldisins í þinghúsinu en Chao, sem er gift leitoga repúblikana í öldungadeildinni, Mich McConnell, hefur setið einna lengst í ríkisstjórn Trumps. Eins sagði menntamálaráðherrann af sér en Betsy DeVos segir í bréfi til Trumps segir að að hegðun sem þessi sé óásættanleg fyrir landið. Aðrir sem hafa sagt af sér eru Mick Mulvaney, sem er fyrrverandi starfsmannastjóri Trump en núverandi erindreki landsins í Norður-Írlandi og aðstoðarþjóðaröryggisráðgjafi landsins, Matt Pottinger.