Franska sendiráðið í Pakistan hefur ráðlagt öllum frönskum ríkisborgurum og fyrirtækjum að yfirgefa landið tímabundið.
Ástæðan fyrir því eru mótmæli í garð Frakka sem hafa lamað stóran hluta landsins í þessari viku.
„Vegna alvarlegra hótana í garð Frakka og franskra hagsmuna í Pakistan er frönskum ríkisborgurum og frönskum fyrirtækjum ráðlagt að yfirgefa landið tímabundið,“ sagði sendiráðið í tölvupósti til franskra ríkisborgara.
Andúð í garð Frakka hefur kraumað undir undanfarna mánuði í Pakistan eftir að forsetinn Emmanuel Macron lýsti yfir stuðningi við tímarit um að endurbirta skopmyndir af Múhameð spámanni. Margir múslimar telja þetta guðlast.
Pakistönsk stjórnvöld hafa í hyggju að banna öfgafullan stjórnmálaflokk í landinu eftir að leiðtogi hans fór fram á að franski sendiherrann yrði rekin úr landi. Leiðtoginn var handtekinn í gær og yfirheyrður af lögreglunni. Mótmæli brutust út víðs vegar um Pakistan í framhaldinu þar sem tveir lögreglumenn létust.