Nærri tvö þúsund manns þurft að flýja

Nærri tvö þúsund manns hafa þurft að flýja heimili sín eftir að eldgos hófst í fjallinu Semeru á eyjunni Java í Indónesíu í dag. Nærliggjandi þorp hafa orðið fyrir barðinu á eldfjallaösku og monsúnrigningu.

Frétt af mbl.is

Eldgos í Indónesíu

Einn íbúi lýsti skelfingu þegar öskuskýin lögðust yfir þorpið hans.

„Það var dimmt, ég sá ekki neitt. Það rigndi vatni og ösku,“ sagði maðurinn í samtali við AFP-fréttastofuna.

„Ég vissi ekki hvar ég átti að leita skjóls. Ég varð að flýja.“

Virknin enn mjög mikil

Stjórnvöld færðu viðbúnað upp á hæsta stig í kjölfar gossins, en talsmaður hamfaramiðstöðvar í Indónesíu sagði að hærra viðbúnaðarstig þýði að nærliggjandi þorp séu í hættu.

„Á heildina litið er virknin enn mjög mikil.“

Í kjölfar eldgossins hafa 1.979 manns verið fluttir í skjól. AFP/Juni Kriswanto

Enn sem komið er hefur ekki verið tilkynnt um manntjón eða meiðsli, en 1.979 manns hafa verið fluttir í skjól á ellefu stöðum og hafa að minnsta kosti sex þorp orðið fyrir áhrifum af eldgosinu.

Heimamenn flúðu á mótorhjólum, oft þrír á hverju hjóli ásamt eigum sínum, á meðan aðrir hjálpuðu öldruðum við að komast burt á öruggan hátt. Einn íbúi var þakinn leðju eftir að ösku hafði rignt á hann.

Eldgos varð í Semeru fyrir ári síðan með þeim afleiðingum að minnst 51 lét lífið og meira en 5.000 heimili eyðilögðust.

Enn sem komið er hefur ekki verið tilkynnt um manntjón. AFP/Putri

• Blogga um frétt