Fjögurra einstaklinga er saknað eftir að einkaþota brotlenti í bandaríska ríkinu Virginíu. Vélinni var flogið inn í lokaða lofthelgi yfir Washington, höfuðborg Bandaríkjanna, og svaraði flugmaðurinn ekki yfirvöldum sem olli því að F-16 herþotur veittu vélinni eftirför.
Bandarísku herþoturnar rufu hljóðmúrinn yfir borginni og voru margir borgarbúar áhyggjufullir vegna látanna enda heyrðist mikill hávaði við þetta.
Lögreglan kom að brakinu nálægt George Washington-þjóðgarðinum klukkutímum eftir brotlendingu og hafði hún þá hvorki fundið neina á lífi né lík.
Fjórir voru um borð í flugvélinni, þar á meðal tveggja ára stúlka og móðir. Óljóst er af hverju flugmaðurinn svaraði ekki yfirvöldum.
Flugvélin sem um ræðir er Cessna Citation-einkaþota.