Allir fimm mennirnir sem staddir voru í lyftu, sem féll 20 metra í Sundbyberg í Svíþjóð í gær, eru látnir.
Frá þessu greinir sænska ríkisútvarpið SVT og enn fremur því að hafin sé rannsókn á því hvort lög um aðbúnað á vinnustöðum hafi verið brotin og saknæm háttsemi hafi leitt til slyssins.
„Þetta er alvarlegt atvik sem við höfum til rannsóknar, fimm manns hafa verið úrskurðaðir látnir,“ segir Gunnar Jonasson, saksóknari við Umhverfis- og vinnuumhverfisstofnun Svíþjóðar, Riksenheten för miljö- och abetsmiljömål, í fréttatilkynningu.
Segir hann nú unnið að því að bera kennsl á hina látnu auk þess að hafa samband við aðstandendur þeirra. Slysarannsóknarnefnd sé nú við rannsókn á vettvangi.
Verktakinn, sem annast framkvæmdir á byggingarsvæðinu í Sundbyberg, hefur tilkynnt slysið til sænsku vinnumálastofnunarinnar og liggja allar framkvæmdir á svæðinu nú niðri uns annað verður ákveðið.