Aðkomumaður uppi í rúmi

Húsráðandi í Glerárhverfi á Akureyri kom að óboðnum gesti í rúmi sínu þegar hann kom heim um klukkan 6.30 í morgun. Gesturinn, sem reyndist bæði svefndrukkinn og ölvaður, kvaðst hafa villst á húsum eftir næturskemmtun í nágrenninu og taldi sig vera kominn á gistiheimili sem hann gistir á.

Hann fékk að halla sér í fangageymslu lögreglunnar á Akureyri. Óboðni næturgesturinn er karlkyns og rúmlega tvítugur. Um hann gildir fornfræg setning: „Vert er að geta þess að hér er um utanbæjarmann að ræða“.

Húsráðandinn kvaðst hafa læst íbúð sinni, sem er í fjölbýlishúsi. Engin ummerki sáust þó um að brotist hafi verið inn í íbúðina, að sögn lögreglu.

• 3 blogg um fréttina

Bloggað um fréttina

• Guðmundur Júlíusson: Skeflilegt að lenda í því að rata í vitlaust rúm!
• Gunnar Th. Gunnarsson: AA - maður
• Anna Dóra Gunnarsdóttir: Maður að sunnan