„Það er í raun bara alger pattstaða uppi og lítið annað að frétta en það að við ætlum að funda hjá ríkissáttasemjara,“ segir Guðríður Arnardóttir, formaður Félags framhaldsskólakennara, í samtali við Morgunblaðið.
Vísar hún í máli sínu til þess að kjarasamningar félagsmanna í Félagi framhaldsskólakennara og Félagi stjórnenda í framhaldsskólum eru nú lausir og munu fulltrúar þeirra funda í húsakynnum ríkissáttasemjara í dag, en fundurinn hefst klukkan 9.
„Það er nákvæmlega ekkert á borðinu og ég get ekki sagt að það sé nokkur gangur í neinum viðræðum,“ segir hún í Morgunblaðinu í dag.