Rannsókn á máli Sindra Þórs Stefánssonar, sem strauk úr fangelsinu Sogni í fyrradag, stendur enn yfir og vinnur lögreglan af fullum þunga að því að hafa hendur í hári hans.
Þetta kemur fram í tilkynningu frá lögreglunni á Suðurnesjum, sem segir tvo hafa verið yfirheyrða með stöðu sakbornings vegna gruns um að eiga aðild að flótta Sindra Þórs.
Hafa báðir þessir einstaklingar verið látnir lausir lausir, en talið er að Sindri Þór hafi farið í gegnum Keflavíkurflugvöll án þess að hafa verið spurður um skilríki er hann flúði land til Svíþjóðar.
Að sögn lögreglu hefur fjöldi upplýsinga og ábendinga borist og stendur úrvinnsla þeirra nú yfir.
Vakið hefur athygli að Sindri Þór hefur lokað Facebook-síðu sinni, sem var opin í gær. Að sögn DV var Sindri Þór virkur á Facebook um hádegisbil í dag og má draga þá ályktun að hann hafi á þeim tímapunkti verið að loka síðunni.
Sindri Þór sætti gæsluvarðhaldi á Sogni vegna meintrar þátttöku sinnar í gagnaversmálinu svo kallaða, og hafði hann verið í varðhaldi frá 2. febrúar.
600 tölvum, að andvirði um 200 milljón króna, var stolið í málinu, en ekki hefur enn tekist að finna þýfið í þessu umfangsmesta þjófnaðarmáli Íslands.