Meirihluti félagsmanna í Félagi grunnskólakennara hefur samþykkt nýjan kjarasamning í allsherjaratkvæðagreiðslu með 74% atkvæða.
Þorgerður Laufey Diðriksdóttir, formaður Félags grunnskólakennara, segir þetta skýr skilaboð um að samningamenn bretti upp ermarnar. „Þetta er skýr niðurstaða um að þetta samtal sé nauðsynlegt og að við þurfum að fara af fullum þunga inn í það næsta haust,“ segir hún. „Annars vegar í okkar baklandi og svo hins vegar við stóra borðið.“
Fram undan sé vinna við raunverulega leiðréttingu á kjörum kennara.
Á kjörskrá voru 4.689 og atkvæði greiddu 3.423 eða 73%. Já sögu 2.533, eða 74%, og nei sögðu 837 eða 24,45%, en auðir seðlar voru 53 eða 1,55%.
Þorgerður segist finna fyrir auðmýkt og þakklæti til allra þeirra félagsmanna sem gáfu sér tíma á annasömum tíma til að skoða samninginn. „Svo þurfum við bara að bretta upp ermarnar og halda áfram,“ segir hún. „Því við erum bara rétt að byrja baráttuna um réttlát kjör fyrir grunnskólakennara og kennara í landinu.“
Skrifað var undir kjarasamninginn í húsakynnum ríkissáttasemjara 25. maí síðastliðinn. Félag grunnskólakennara hafði þá verið án kjarasamnings síðan í desember á síðasta ári en nýi samningurinn gildir frá 1. desember 2017 til 30. júní 2019.
Kjarasamningurinn felur meðal annars í sér 150 þúsund króna eingreiðslu 1. júlí, 4,1% launahækkun 1. júní, vinnumatið fellur út og tími til undirbúnings er aukinn.
Þá bætist launaflokkur við eftir 20 ár í kennslu (eða við 50 ára aldur hjá þeim sem taka laun eftir lífaldri) frá og með 1. ágúst 2018. Jafnframt er menntunarkafli óbreyttur frá samningi sem borinn var undir félagsmenn í mars.