Áslaug Thelma Einarsdóttir, fyrrverandi forstöðumaður einstaklingsmarkaðar hjá Orku náttúrunnar (ON), og Helga Jónsdóttir, starfandi forstjóri Orkuveitu Reykjavíkur (OR), hittust á fundi síðdegis.
Eiríkur Hjálmarsson, upplýsingafulltrúi OR, staðfestir í samtali við mbl.is að fundinum sé lokið en hann sátu ásamt Áslaugu og Helgu, lögmaður Áslaugar, lögmaður OR og Berglind Rán Ólafsdóttir, starfandi framkvæmdastjóri ON. Samkvæmt heimildum mbl.is er Áslaug Thelma bundin trúnaði um það sem fram fór á fundinum.
Áslaugu Thelmu var sagt upp störfum hjá Orku náttúrunnar, dótturfyrirtæki Orkuveitunnar, fyrir um hálfum mánuði. Hún hefur gagnrýnt fyrrverandi framkvæmdastjóra ON, Bjarna Má Júlíusson, fyrir óviðeigandi hegðun gagnvart starfsfólki fyrirtækisins.
Bjarni Bjarnason, forstjóri Orkuveitunnar, óskaði eftir því í síðustu viku að víkja tímabundið úr starfi á meðan óháð úttekt yrði gerð á vinnustaðamenningu fyrirtækisins vegna mála tiltekinna starfsmanna sem verið hafa til umfjöllunar í fjölmiðlum.
Helga tók við starfi forstjóra á mánudag og sagði hún í samtali við mbl.is fyrr í vikunni að markmiðið sé að velta við hverjum steini og komast til botns í því hvort eitthvað þurfi að laga og þá hvað þurfi að gera til þess.