Innri endurskoðun Reykjavíkurborgar, sem jafnframt er innri endurskoðandi Orkuveitu Reykjavíkur, fer með úttekt á vinnustaðamenningu OR og hefur hún fengið til liðs við sig sérfræðinga úr háskólasamfélaginu.
Þetta kemur fram í svari Helgu Jónsdóttur, starfandi forstjóra OR, við fyrirspurn mbl.is.
Þar segir að í úttektinni fáist væntanlega upplýsingar sem ættu að geta orðið veganesti í máli Áslaugar Thelmu Einarsdóttur, fyrrverandi forstöðumanns einstaklingsmarkaðar hjá Orku náttúrunnar, dótturfyrirtækis OR, en henni var sagt upp störfum í síðasta mánuði.
Hún hafði gagnrýnt fyrrverandi framkvæmdastjóra ON, Bjarna Má Júlíusson, fyrir óviðeigandi hegðun gagnvart starfsfólki fyrirtækisins.
Að sögn Helgu er stefnt á fund á milli hennar, Áslaugar Thelmu, framkvæmdastjóra ON og lögmönnum þegar upplýsingar úr úttektinni liggja fyrir.