Auknar eftirlitsheimildir vegna brota á vinnumarkaði

Ásmundur Einar Daðason, félags- og jafnréttismálaráðherra, segist binda vonir við ný lög sem auka heimildir Vinnueftirlitsins og Vinnumálastofnunar við eftirlit á vinnustöðum og sem veita stofnununum víðtækari heimildir til að miðla upplýsingum sín á milli og til ríkisskattstjóra og lögreglu. Þetta er haft eftir ráðherra í frétt á vef Stjórnarráðsins og sagt að aðgerðirnar „muni torvelda markvissa brotastarfsemi á vinnumarkaði“.

Stöðva verði háttsemi af því tagi sem lýst var í fréttaskýringaþættinum Kveiki í gær og draga þá sem slík brot fremja til ábyrgðar. 

Frétt af mbl.is

„Í sömu gildru og hundruð annarra“

Vísar Ásmundur Einar með orðum sínum í breytingu á lögum um réttindi og skyldur erlendra fyrirtækja sem senda starfsmenn tímabundið til Íslands. Er markmið laganna að tryggja að laun og önnur starfskjör starfsmanna séu í samræmi við íslensk lög og kjarasamninga, sem og „að bæta yfirsýn stjórnvalda yfir eðli og umfang þessara mála“. 

Bendir ráðherra á að stutt sé liðið frá gildistöku laganna og virkni þeirra því ekki að fullu komin í ljós. „Reynslan sýni að brot á vinnumarkaði snúist oft um mun fleiri þætti en kjarasamninga eina og sér og varði gjarna löggjöf á ýmsum sviðum. Því skipti miklu máli að eftirlitsaðilar geti miðlað upplýsingum sín á milli til að eftirlitið skili fullnægjandi árangri,“ segir í fréttinni.

Glöggt hafi komið fram í Kveik að þeir aðilar sem hafi „skýran ásetning um að brjóta á vinnandi fólki beiti til þess margvíslegum aðferðum. Brotin séu margvísleg og sönnunarfærslan geti verið flókin. Til að eftirlitið sé árangursríkt þurfi virkt samstarf á mörgum sviðum, þvert á stofnanir og milli margra ólíkra aðila.“

Brot sem þessi verði ekki liðin og kveðst Ásmundur Einar hafa vakið athygli á  stöðu þessara mála um miðjan september. Þá hafi hann lagt fram tillögu um aukna samvinnu eftirlitsaðila til að sporna gegn félagslegum undirboðum á íslenskum vinnumarkaði.

„Til samstarfs í þessu skyni hefur ráðherra kallað til Alþýðusamband Ísland, atvinnuvega- og nýsköpunarráðuneyti, Bandalag háskólamanna, BSRB, dómsmálaráðuneyti, fjármála- og efnahagsráðuneyti, Embætti ríkislögreglustjóra, Embætti ríkisskattstjóra, Samband íslenskra sveitarfélaga, Samtök atvinnulífsins, Vinnueftirlitið og Vinnumálastofnun,“ segir í fréttinni.

Hlutverk hópsins verði m.a. að leggja til leiðir sem vænlegar eru til árangursríkara eftirlits, leggja til sameiginleg markmið eftirlitsaðila á vinnumarkaði, sem og að skilgreina mælikvarða til að meta árangurinn af þeim aðgerðum sem lagðar verða til.

Gert er ráð fyrir að samstarfshópurinn skili ráðherra skýrslu fyrir 1. febrúar 2019.

• Blogga um frétt