Arkibúllan hannaði endurbyggingu á Nauthólsvegi 100 í samræmi við óskir verkkaupa og eftirlit arkitektastofunnar fólst í því að fylgjast með því að iðnaðarmenn fylgdu teikningum og verkin væru sannanlega unnin. Verkið er unnið samkvæmt ákvörðun Reykjavíkurborgar.
Þetta kemur fram í yfirlýsingu á vefsíðu Arkibúllunar í tengslum við fréttaflutning af endurgerð braggans við Nauthólsveg 100. Endurgerðin hefur verið mjög umdeild, en kostnaður við framkvæmdirnar fór langt fram úr áætlun. Upphaflega var gert ráð fyrir að kostnaðurinn yrði 158 milljónir, en heildarkostnaður varð 415 milljónir.
Grasstrá sem voru gróðursett í kringum braggann kostuðu 757 þúsund krónur en ástæða þess var að þau voru höfundarvarin.
Arkibúllan bendir einnig á í sinni yfirlýsingu að Reykjavíkurborg hafi gert alla samninga við verktaka, beri ábyrgð á gerð og eftirfylgni kostnaðaráætlana á öllum stigum framkvæmda og hafi ákveðið að beita ekki útboðum í verkinu.
Fréttin hefur verið uppfærð og hér að neðan má lesa yfirlýsingu sem barst frá Arkibúllunni í heild sinni:
„Verkið á Nauthólsvegi 100 er unnið samkvæmt ákvörðun Reykjavíkurborgar.
Arkibúllan hannaði enduruppbygginguna í samræmi við óskir verkkaupa.
Misskilnings hefur gætt í fjölmiðlaumræðu síðustu daga um eftirlit Arkíbúllunnar með vinnu á verkstað. Margrét Leifsdóttir arkitekt er starfsmaður Arkíbúllunnar en ekki einn af eigendum stofunnar. Hún hefur ekki farið neinar ferðir erlendis á vegum þessa verkefnis. Varðandi margumrædd kaup á stráum, þá kom Arkíbúllan ekki að hönnun landslags á svæðinu. Um kostnað við þann verkþátt eins og aðra verkþætti framkvæmdarinnar hafði Reykjavíkurborg lokaorðið. Eftirlit Arkibúllunar fólst í að fylgjast með því að iðnaðarmenn fylgdu teikningum og verkin væru sannarlega unnin.
Að lokum er sjálfsagt að árétta, að það var Reykjavíkurborg sem gerði alla samninga við verktaka, ber ábyrgð á gerð og eftirfylgni kostnaðaráætlana á öllum stigum framkvæmda og ákvað að beita ekki útboðum í verkinu. Þess vegna vísum við fyrirspurnum fjölmiðla sem varða þessa þætti verkefnisins til Reykjavíkurborgar.“