Mannréttindadómstóll Evrópu kveður upp dóm vegna skipan dómara í Landsrétt 12. mars næstkomandi, en þá mun koma í ljós hvort skipanin standist lög og ákvæði mannréttindasáttmála Evrópu. Þetta kemur fram í tilkynningu dómstólsins til málsaðila sem mbl.is hefur undir höndum.
Vilhjálmur H. Vilhjálmsson, verjandi manns sem stefnt hafði verið fyrir Landsrétt, telur að seta Arnfríðar Einarsdóttur í Landsrétti hafi verið brot á lögum mannréttindasáttmálans vegna skipunar Sigríðar Á. Andersen dómsmálaráðherra á Arnfríði og þremur öðrum dómurum í Landsrétt, en hæfnisnefnd taldi aðra hæfari og voru lög því brotin við skipunina.
Dómstólar hafa þegar dæmt þremur umsækjendum um stöðu dómara við réttinn miskabætur og var íslenska ríkið bótaskylt í máli þess fjórða, en Hæstiréttur taldi setu Arnfríðar ekki andstæða lögum og var því óskað eftir því að Mannréttindadómstóll Evrópu tæki málið fyrir.
Fréttin hefur verið uppfærð.