Heilt hótel híft upp í Helguvík

Heilu 150 herbergja hóteli er þessa dagana verið að skipa upp í Helguvíkurhöfn og setja saman steinsnar frá Keflavíkurflugvelli. Um er að ræða nýtt hótel Marriott-hótelkeðjunnar sem sett er saman úr stáleiningum frá Kína.

Hljóðið var gott í Árna Val Sólonssyni, eiganda Capital Hotels-keðjunnar og sérleyfishafa Marriott-hótelsins, þegar Morgunblaðið heyrði í honum og sagði hann að vel hefði gengið. Einingarnar væru hífðar í land í Helguvík og síðan ekið á byggingarsvæðið þar sem þær eru settar saman jafnóðum.

„Þetta mun gerast mjög hratt á næstu dögum, sérstaklega ef veðrið verður eins og það var í dag,“ segir Árni í Morgunblaðinu í dag.