5.600 heimili og vinnustaðir urðu rafmagnslaus á svæði Rarik í óveðrinu sem gekk yfir landið í dag, flestir á Suðurlandi og Suðausturlandi. Rúmlega 100 staurar brotnuðu og einnig var eitthvað um vírslit og sláarbrot.

Þetta kemur fram á vef Rarik.

Þar kemur fram að einn bær í Hvalfirði er rafmagnslaus og viðgerð þar bíður morguns. 

Á Suðurlandi eru bilanir á tíu stöðum. Rafmagnslaust er á nokkrum bæjum undir Eyjafjöllum. Rafmagn er skammtað í Vík og eru íbúar beðnir um að spara rafmagn. Þá er rafmagnslaust frá Laugarvatni að Laugardalshólum. Einnig er rafmagnslaust á nokkrum bæjum í Landeyjum.

Rafmagnslaust er í innsta hluta Fljótshlíðar og inn í Þórsmörk. Línan milli Kirkjubæjarklausturs og Víkur er úti og þar með er rafmagnslaust í Álftaveri, Meðallandi og hluta Skaftártungna. Reiknað er með að langflestir verði komnir með rafmagn í kvöld eða í nótt, annað hvort eftir viðgerð eða með varaaflsstöðum.

Á Austurlandi er búið er að koma á rafmagni í sveitarfélaginu Hornafirði. Á Vopnafirði er rafmagnslaust í Vesturárdal að hluta og út ströndina í Vopnafirði, að því er segir í tilkynningu.

Tengdar fréttir

Ofsaveður í febrúar 2020

Tjón á Blátindi eftir flakk um höfnina

• Tjón hleypur á hundruðum milljóna
• Veturinn óvenjukostnaðarsamur fyrir RARIK
• Rafmagnstruflanir næstu daga og vikur
• Ekki lengur þörf á að skammta rafmagn á Suðurlandi

» Fleiri tengdar fréttir

• Blogga um frétt