Kári Stefánsson, forstjóri Íslenskrar erfðagreiningar, fundaði með Víði Reynissyni, yfirlögregluþjóni hjá ríkislögreglustjóra, Ölmu D. Möller landlækni, Þórólfi Guðnasyni sóttvarnalækni auk fulltrúa frá forsætisráðuneytinu í dag. Efni fundarins var aðkoma Íslenskrar erfðagreiningar á skimunum ferðamanna við komuna til landsins.
Kári vildi sem minnst segja um fundinn þegar mbl.is leitaði eftir því. „Þetta var ósköp huggulegur fundur. Við ræddum almennt um hluti og vorum að skiptast á skoðunum.“
Kári sagði í Kastljósi á RÚV á miðvikudagskvöld að fyrirtækið myndi ekki koma að skimun á landamærum Íslands ef verkefnið yrði unnið undir stjórn heilbrigðisráðuneytisins. Samskiptin milli fyrirtækisins og ráðuneytisins væru þannig að fyrirtækið treysti sér ekki til þess. Annað hljóð var í honum eftir fræðslufund ÍE um COVID-19 í gærkvöldi þar sem hann sagði að fyrirtækið myndi koma til með að aðstoða, veita ráð, gefa hugbúnað og veita aðgang að sérþekkingu hvað varðar skimunina.
Víðir segir í samtali við mbl.is að í sjálfu sér hafi ekkert nýtt komið fram á fundinum. „Við vorum að tryggja samskiptaleiðirnar, þetta var góður fundur og þessi vinna er komin á fullt og við erum að hitta alla sem koma að útfærslunni.“
Víðir segir að Íslensk erfðagreining horfi á það sem samfélagslega skyldu sína að taka þátt í skimun ferðamanna. „Þau hafa lagt mikla vinnu í þetta hingað til og eru tilbúin í að halda áfram að hjálpa.“
Fyrirkomulag skimunarinnar mun skýrast eftir helgi að sögn Víðis en kapp verður lagt á að ljúka þeirri vinnu sem eftir er við útfærsluna um helgina. „Ég hugsa að á þriðjudag, í síðasta lagi miðvikudag, verði komin skýrari mynd á þetta.“