Bjarni Benediktsson fjármálaráðherra kveðst taka undir það að veik viðspyrna af hálfu sveitarfélaga sé ekki gott innlegg inn í þá efnahagsstefnu sem ríkið sé nú að keyra. „Þess vegna höfum við verið í margvíslegum aðgerðum til að létta undir með sveitarfélögum,“ sagði Bjarni í óundirbúnum fyrirspurnartíma á Alþingi í dag.
Hann spurði jafnframt hvort það væri þess virði fyrir sveitarfélögin að standa fjárhagslega sjálfstæð eins og þau gera í dag með sjálfstæða tekjustofna.
Logi Einarsson, formaður Samfylkingarinnar, spurði Bjarna út í stuðning ríkissjóðs við sveitarfélög í tengslum við kórónukreppuna.
„Kemur til greina að beita sér fyrir því að sveitarfélögin geti tekið hagstæðari lán, bara á svipuðum kjörum og stuðningslán til fyrirtækja voru? Og ég spyr á endanum: Er hæstvirtur ráðherra ekki sammála mér um það að veik viðspyrna og geta sveitarfélaganna til að taka þátt í þessu erfiða verkefni muni bitna á okkur öllum, líka verkefni hæstvirts ráðherra,“ spurði Logi m.a.
„Jú, ég get tekið undir það að veik viðspyrna af hálfu þess hluta hins opinbera sem sveitarfélögin eru eða standa fyrir væri ekki gott innlegg inn í þá efnahagsstefnu sem við erum núna að keyra. Þess vegna höfum við verið í margvíslegum aðgerðum til að létta undir með sveitarfélögum. Við höfum farið í gegnum þingið með fjöldann allan af aðgerðum og vorum núna síðast, bara svo ég nefni eitt dæmi, að auka endurgreiðslur vegna framkvæmda sem mun gera þeim auðveldara fyrir að standa í þeim á næsta ári,“ sagði Bjarni.
Logi nefndi í sinni ræðu, að það væri vegna meiri beins stuðnings á Norðurlöndunum til sveitarfélaga sem þau væru ekki í eins vondri aðstöðu núna og sveitarfélögin á Íslandi. „Þau búa bara við ofboðslega erfitt ástand núna,“ sagði Logi.
Bjarni benti á, að á Norðurlöndunum sé að jafnaði miklu meiri beinn stuðningur. Menn væru meira á fjárlögum.
„Þar er ekki farið með jöfnunarsjóð með þeim hætti sem við gerum hér, að vera með fyrir fram settar formreglur þannig að jöfnunarsjóður sé að ýkja sveiflurnar eins og gerist á Íslandi, heldur horfa menn til hinnar raunverulegu þarfar,“ sagði Bjarni.
„Þess vegna er það sem ég segi að þetta kallar á miklu dýpri spurningar eða dýpri skoðun á fjárhagslegum samskiptum ríkis og sveitarfélaga. Það getur vel verið að við ættum að ráðast í þá spurningu: Er það þess virði fyrir sveitarfélögin að standa fjárhagslega sjálfstæð eins og þau gera í dag með sjálfstæða tekjustofna, þegar betur er skoðað,“ spurði Bjarni að lokum.