Valgarður leiðir lista Samfylkingar í Norðvestur

Framboðslisti Samfylkingarinnar í Norðvesturkjördæmi fyrir alþingiskosningarnar í haust var samhljóða samþykktur á fundi kjördæmisráðs Samfylkingarinnar í gærkvöldi, 10. maí.

Kosið var í þrjú efstu sætin á auknu kjördæmaþingi 27. mars síðastliðinn en uppstillingarnefnd sá um að stilla upp listanum frá fjórða sæti.

Þá er það Valgarður Lyngdal Jónsson, forseti bæjarstjórnar Akraneskaupstaðar, sem leiðir listann. „Ég er þakklátur fyrir traustið sem félagar mínir í Norðvesturkjördæmi hafa sýnt mér. Ég er fullur bjartsýni, fús til verka og ég hlakka til samstarfsins við meðframbjóðendur mína og Samfylkingarfólk um allt kjördæmið,“ segir Valgarður.

Jónína Björg Magnúsdóttir skipar annað sætið og segir í fréttatilkynningu að hún sé mörgum kunn fyrir „íspinnalagið“ Sveiattan þar sem hún samdi textann við lagið „Mamma þarf að djamma“. Jónína hefur auk þess víðtæka reynslu úr íslensku atvinnulífi, hefur mikið starfað með fötluðum auk þess að starfa sem stuðningsfulltrúi og kennari, vitavörður, matráður, flokkstjóri og svo hefur hún aðstoðað í sauðburði í mörg ár á Hömrum í Haukadal. „Hjarta mitt brennur fyrir fólkið í landinu, reynslu þess og lífi hvort sem er í sorg og í gleði,“ segir Jónína.

Hér má sjá listann í heild sinni:

1. Valgarður Lyngdal Jónsson - Akranes
2. Jónína Björg Magnúsdóttir - Akranes
3. Sigurður Orri Kristjánsson - Reykjavík
4. Edda Katrín Einarsdóttir - Ísafjörður
5. Ída Finnbogadóttir - Borgarbyggð
6. Gunnar Rúnar Kristjánsson – Austur-Húnavatnssýsla
7. Ingimar Ingimarsson – Reykhólar
8. Steinunn Sigurbjörnsdóttir – Dalasýsla
9. Guðríður Sigurjónsdóttir - Akranes
10. Gylfi Þór Gíslason - Ísafjörður
11. Guðný Friðfinnsdóttir – Sauðakrókur
12. Oddur Sigurðarson - Hvammstangi
13. Salvör Svava G. Gylfadóttir – Borgarbyggð
14. Guðni Kristjánsson - Sauðarkrókur
15. Sigurbjörg K. Ásgeirsdóttir - Patreksfjörður
16. Björn Guðmundsson – Akranes

• Blogga um frétt