Þrívíddarlíkan af gosinu uppfært
Setja bókamerki
Flogið var yfir eldgosið í Geldingadölum í gær til að mynda það í vísindaskyni en það hefur ekki verið hægt síðan 18. maí vegna lélegs skyggnis.
Birgir V. Óskarsson, jarðfræðingur hjá Náttúruvísindastofnun, tók myndirnar á Hasselblad-myndavél en með myndunum fást nýjustu tölur um rúmmál, flatarmál og hraunflæði á gosstöðvunum. Tölurnar eru svo birtar á vef Jarðvísindastofnunar Háskóla Íslands.
Að sögn Birgis heldur hraunið áfram að stækka, jafnt og þétt og ekki er útlit fyrir að það hætti að gjósa á næstunni.
„Þetta er komið í 2,6 ferkílómetra en það var rétt undir tveimur ferkílómetrum síðast þegar við skoðuðum svæðið. Hraunflæðið er í kringum 12 rúmmetra á sekúndu. Við vorum með svipaðar tölur síðast sem þýðir að þetta helst mjög stöðugt,“ segir hann.
Nýjustu mælingar Jarðvísindastofnunar Háskóla Íslands staðfesta þetta:
„Meðalhraunrennslið yfir tímabilið 18. maí – 2. júní (15 dagar) er 12.4 m3/s. Þessi mæling staðfestir að sú aukning á hraunrennsli sem varð í byrjun maí hefur haldist. Hraunrennsli í maí var því tvöfalt meira en var að meðaltali fyrstu sex vikurnar. Hraunið mælist nú 54 milljón rúmmetrar og flatarmálið 2,67 ferkílómetrar,“ segir í tilkynningu frá stofnuninni.
Náttúrufræðistofnun Íslands hefur notað myndirnar hans Birgis til að útbúa þrívíddarlíkan sem sýnir dreifingu hraunflæðisins á gossvæðinu. Nýuppfærða útgáfu af líkaninu má sjá hér.
Loftmyndir af umbrotsvæðinu á Reykjanesskaga má svo sjá á vef Landmælinga Íslands.
Nemendur í HÍ reistu tjaldbúðir án leyfis
Telur forsendur fyrir vaxtalækkun
Krefjast stöðvunar framkvæmda
Hvorki sést áður hér á landi né annars staðar
„Umsátursástand“
Kaldasti veturinn kom að óvörum
Banna mengandi búnað sem leyfður er á Íslandi