Björn Leví Gunnarsson, þingmaður Pírata, segir á Facebook-síðu sinni að upplýst hafi verið um að samgönguáætlun sé vanfjármögnuð um 1,5 milljarða á nefndarfundi umhverfis- og samgöngunefndar Alþingis fyrr í dag.
Þetta segir hann furðulegt þar sem hans skilningur við fjárlagavinnu hafi verið að áætlunin hafi verið fullfjármögnuð.
Vekur hann sömuleiðis athygli á gamalli færslu Sigurður Inga Jóhannessonar, samgöngu- og sveitarstjórnarráðherra, frá því áætlunin var samþykkt á Alþingi þar sem hann sagði hana fullfjármagnaða.
Björn segist í færslunni skrifa frá fundinum og upplýsir jafnóðum um efni fundarins eða það sem þar kemur fram.
Tilefni fundarins var fréttaflutningur þess efnis að fallið hafi verið frá útboði stærsta áfanga vegaframkvæmda á Dynjandisheiði.
Lilja Rafney Magnúsdóttir, þingmaður Vinstri grænna, segir á Facebook-síðu sinni að verklok haldist óbreytt þó að flýting verkefnisins hafi ekki gengið eftir.
Hún segir að fram hafi komið á nefndarfundinum í dag að sumir áfangar heiðarinnar gangi framar áætlunum og segir fréttaflutning af seinkun „ekki fréttir“.