Ísland varð appelsínugult á korti Sóttvarnastofnunar Evrópu í gær en landið hefur verið rauðmerkt frá 5. ágúst.
Stuðst er við samræmdan litakóða þar sem lönd eru flokkuð í mismunandi hættuflokka eftir nýgengi smita og hlutfalli jákvæðra sýna.
Nýgengi innanlandssmita er nú 114,5 samkvæmt covid.is.
Litakóðunarkerfið hefur þann tilgang að veita upplýsingar um stöðu heimsfaraldursins í hverju landi fyrir sig svo hægt sé að bera þau saman og átta sig á aðstæðum.
Það er svo undir hverju landi komið hvaða takmarkanir kunna að fylgja í kjölfarið. Þá nota sum í Evrópu sín eigin yfirlitskort til að meta áhættu, svo sem Þýskaland og Bretland.