Ólafur Teitur hættir sem aðstoðarmaður Þórdísar

Ólafur Teitur Guðnason mun ekki halda áfram sem aðstoðarmaður Þórdísar Kolbrúnar Reykfjörð Gylfadóttur, sem nýlega tók við sem utanríkisráðherra fyrir hönd Sjálfstæðisflokksins. Frá þessu greinir Ólafur í færslu á Facebook. Þórdís hafði áður verið ráðherra ferðamála, iðnaðar og nýsköpunar.

Í færslunni segir Ólafur að hann hafi hlakkað til að halda áfram, en að tilhlökkunin hafi einnig verið blönduð ákveðnum efasemdum um að hann væri í stakk búinn fyrir verkefnið. Vísar hann til þess að hafa gengist undir aðgerðir fyrir nokkru síðan og að hann finni að hann þurfi að passa vel upp á líkamann og heilsuna og færast ekki of mikið í fang.

Þegar ljóst varð hvaða ráðuneyti Þórdís fékk segir Ólafur Teitur að það hafi kallað á endurmat og niðurstaðan hafi verið sú að rétt væri að láta af starfi aðstoðarmanns ráðherra. Ólafur Teitur, sem áður var upplýsingafulltrúi Rio Tinto Alcan í Straumsvík, segir ekki liggja fyrir hvað taki við.

Ólafur Teitur var fyrr á þessu ári í ítarlegu viðtali við SunnudagsMoggann þar sem hann ræddi um missi eiginkonu sinnar til 23 ára.

Frétt af mbl.is

Sorgin er hin hliðin á ástinni

• Blogga um frétt