Flugvélin sést á myndbandsupptökum
Setja bókamerki
Lögreglan á Suðurlandi hefur fengið afhentar myndbandsupptökur úr öryggismyndavélum sem staðsettar eru í grennd við Þingvallavatn, til að mynda frá eigendum frístundahúsa.
Sumar upptökurnar sýna flugvélina, sem fórst í vatninu á fimmtudag, á flugi.
„Við höfum fengið myndbönd úr öryggismyndavélum þarna í kring. Á einhverjum þeirra sjáum við til vélarinnar,“ segir Oddur Árnason yfirlögregluþjónn í samtali við mbl.is.
Virðist ætla að lenda
Samkvæmt heimildum mbl.is virðist sem svo, á einni upptökunni, að flugvélinni sé stýrt niður að vatninu með vinstribeygju.
Í kjölfarið líti út fyrir að vélinni hafi verið ætlað að hafa snertingu við vatnið, það er að annað hvort koma inn til snertilendingar eða til að lenda á vatninu.
Samkvæmt sömu heimildum mbl.is næst á upptöku það augnablik þegar flugvélin fer ofan í vatnið.
Heimildirnar herma að vatnið hafi verið ísilagt á þessum tíma. Ísinn mun þó hafa verið þunnur.
Samkvæmt mælingum Veðurstofunnar var 10,9 gráða frost á Þingvöllum klukkan níu að morgni þessa fimmtudags.
Klukkan tólf á hádegi, eða um það leyti sem flugvélin er talin hafa farið í vatnið, mældist 7,5 gráða frost.
Fannst á upptöku fyrir klukkan 12
Eigendur sumarhúsa í nágrenni við vatnið voru á föstudag beðnir um að leita í myndbandsupptökum öryggismyndavéla sinna, og tiltók lögregla að einkum væri horft til tímabilsins frá kl. 12 til 14.
Á ofangreindri upptöku fannst þó atvikið ekki fyrr en spólað var aftur fyrir klukkan 12. Samkvæmt tímastimpli hennar mun flugvélin hafa farist á tólfta tímanum.
Hafi ekki áhrif á vitnisburði
Oddur segir lögregluna ekki munu upplýsa hvað fram komi á þeim upptökum sem henni hafa borist.
„Við ætlum ekki að auglýsa hvað kemur fram á þeim,“ bætir hann við og tekur fram að það sé gert til að hafa ekki áhrif á vitnisburði sem mögulega eigi eftir að koma fram.
Málið sé til rannsóknar og einstakir þættir um atburðarásina verði ekki gefnir út.
Bíða færis
Enn er stefnt að því að ná í lík þeirra fjögurra sem létust í slysinu, síðar í þessari viku þegar veður leyfir, að sögn Odds.
„Það er forgangsmál að ná í líkamsleifar hinna látnu. Það er minni þrýstingur á að ná flakinu upp, en menn vilja samt ná því.“
Norskur lögreglumaður dæmdur
Krefjast stöðvunar framkvæmda
Banna mengandi búnað sem leyfður er á Íslandi
„Höfum ekki náð að skríða upp úr þeirri gryfju“
Þyngri refsing fyrir að nauðga stjúpdóttur æskuvinar
Hvorki sést áður hér á landi né annars staðar
Strand skemmtiferðaskips kallar á erlenda aðstoð
Frambjóðendur skila inn listum í Hörpu