Innlent | mbl | 8.2.2022 | 16:05

Segjast aldrei hafa upplifað annan eins kærleik

Frá leitinni á Þingvallavatni um helgina. mbl.is/Óttar

Fjölskylda bandaríska áhrifavaldsins og hjólabrettakappans Josh Neuman, sem var yngsti farþeginn í flugvélinni sem fórst við Þingvelli, ætlar að koma á fót góðgerðasjóði til að halda minningu hans á lofti.

Þau segjast jafnframt þakklát fyrir alla þá samúð sem þau hafa fundið frá Íslendingum. Þau hafi aldrei upplifað annan eins náungakærleik og á síðustu dögum. Íslendingar hafi umvafið fjölskylduna á þessum erfiðu tímum.

Þakkar fjölskyldan sérstaklega björgunarsveitum fyrir aðkomu þeirra að leitinni að vélinni og þeim sem fórust, í yfirlýsingu á Facebook-síðu Neuman.

Neuman var aðeins 22 ára gamall, en fjölskyldan rifjar upp að hann hafi alla tíð sótt í ævintýri og verið skapandi. Þá hafi hann ekki aðeins lifað lífinu heldur verið lífið sjálft. Lýsir fjölskyldan honum sem mjög góðhjörtuðum einstakling sem hafi haft mikil áhrif á þá sem voru honum nærri.

Josh Neuman var yngstur þeirra sem lést í flugslysinu á Þingvallavatni.

Besti dagur í lífi hans

Fjölskyldan segir hann jafnframt hafa látist við að gera það sem hann elskaði og það stuttu eftir að hann upplifði norðurljósin á Íslandi í fyrsta skipti, en hann hafði meðal annars sagt í kjölfarið að það væri besti dagur lífs hans.

Rifjað er upp að Neuman hafi haft fimm grundvallargildi í lífi sínu, en þau voru eftirfarandi:

Gerðu það sem þú hefur ástríðu fyrir.
Tala mun aldrei gera þig hamingjusaman.
Ef þér mistekst ekki ert þú ekki að leggja nægjanlega hart að þér.
Ekki hafa áhyggjur af því sem aðrir segja ef þú gerir það sem þú elskar að gera.
Lífið byrjar þar sem þægindaramminn endar.

Þetta var ekki í fyrsta skipti sem Neuman kom til Íslands, en síðasta sumar birti hann myndskeið á Youtube-síðu sinni þar sem hann leikur eftir þekkta senu úr kvikmyndinni The secret life of Walter Mitty þar sem aðalsöguhetjan rennur sér á hjólabretti af Fjarðarheiði niður í Seyðisfjörð.

Hann hefur jafnframt sett fjölmörg myndbönd á veituna þar sem hann rennir sér á hjólabretti niður stórar brekkur víða um heim.