Fagráð Landspítala lýsir í ályktun yfir þungum áhyggjum af mönnun fagfólks á Landspítala. Kemur fram að starfsfólk vanti í nær öllum fagstéttum á Landspítala. Fagráðið segir að það hafi neikvæð áhrif á þjónustuna og geti skapað ógn við öryggi sjúklinga og starfsfólks.
Kallað hefur verið eftir bættum starfskjörum fyrir starfsfólk spítalans í kjölfar mikilla uppsagna, m.a. í röðum hjúkrunarfræðinga. Guðbjörg Pálsdóttir, formaður félags íslenskra hjúkrunarfræðinga, sagði fyrr í mánuðinum að víða um landið væri mönnunin í verkfalli betri en nú er raunin.
„Fagráðið skorar á stjórnvöld að styðja við Landspítala með öllum tiltækum ráðum svo hægt sé að tryggja viðeigandi þjónustu við sjúklinga,“ segir jafnframt í ályktun fagráðs
Willum Þór Þórsson heilbrigðisráðherra sagði við mbl.is, fyrr í dag, að síðar í dag myndi hann tilkynna um nýjan viðbragðshóp til að bregðast við neyðarástandinu á bráðamóttöku Landspítalans og víðar í heilbrigðiskerfinu.