„Koma inn á rétt­um tíma og svo stopp­ar allt“

Mikil umferð er í Kauptúni í Garðabæ. Vegaframkvæmdir eru á …
Mikil umferð er í Kauptúni í Garðabæ. Vegaframkvæmdir eru á svæðinu. Myndin er úr safni. mbl.is/Valli

Strætisvagnar á leið 21 tefjast um að minnsta kosti 10-15 mínútur við það að koma við á stoppistöðinni í Kauptúni í Garðabæ. Gatnaviðgerðir og þung umferð er á svæðinu. Þetta segir Guðmundur Heiðar Helgason, upplýsingafulltrúi hjá Strætó bs., í samtali við mbl.is.

„Þeir eru að koma þarna inn og virðast festast í einhverju umferðaröngþveiti. Við erum búin að gefa út tilkynningu á síðunni okkar að það megi búast við miklum seinkunum út af þessu. Við erum jafnvel að skoða það að loka þessari stöð á meðan ástandið er svona ef þetta heldur svona áfram. Við biðjum fólk um að fylgjast með, bæði á vögnum í rauntíma og tilkynningum á síðunni,“ segir Guðmundur.

„Vagnarnir koma þarna inn á réttum tíma og svo stoppar allt,“ segir Guðmundur en vagnarnir eru þá orðnir 10-15 mínútum á eftir áætlun eftir þetta eina stopp.

Framkvæmdir klárast um þrjú leytið

Kristinn Lind Guðmundsson, sérfræðingur hjá Vegagerðinni, segir að mörg símtöl hafi borist Vegagerðinni vegna umferðar á svæðinu og segir að lögregla stýri þar nú umferð.

„Við erum að malbika ramp á Reykjanesbrautinni. Vandamálið er aðallega flæði umferðar frá svæðinu en þetta klárast um þrjú leytið,“ segir Kristinn.

„Obbinn af malbikun á höfuðborgarsvæðinu er gerð á nóttunni og kvöldin en það er 30% dýrara en framkvæmdir á daginn.“

Guðbrandur Sigurðsson, aðstoðaryfirlögregluþjónn hjá lögreglunni á höfuðborgarsvæðinu, kannaðist ekki við að um meiri tafir á umferð en venjulega væri vegna framkvæmdanna í Kauptúni.

„Það þarf að leggja malbik og halda við og fræsa. Þetta er gert á sumrin og þá er þrengt og jafnvel lokað leiðum. Hjáleiðir bera ekki alltaf eins mikla umferð og það er fljótt að valda miklum töfum,“ segir Guðbrandur.

mbl.is