Karlmaður var dæmdur til 16 mánaða fangelsisvistar í Héraðsdómi Reykjaness í gær fyrir stórfellt fíkniefnalagabrot með því að hafa staðið að innflutningi á tæplega 700 grömmum af kókaíni ætluð til söludreifingar hér á landi í ágóðaskyni.
Maðurinn, Ilja Lescovs, játaði að hafa staðið að innflutningnum en sagði efnin ætluð til eigin neyslu, að því er kemur fram í dóminum.
Maðurinn kom til Íslands í janúar með flugi frá Barcelona í Spáni. Á Keflavíkurflugvelli fundust 250 grömm af kókaíni í nærbuxum mannsins við líkamsleit og strax í kjölfarið kvaðst hann vera með 500 grömm innvortis.
Við rannsókn málsins afritaði lögregla gögn úr farsíma ákærða og skoðaði bankaviðskipti hans.
Í farsímagögnum fannst ekkert tengt innflutningi nefndra fíkniefna en við rannsókn á fjárhagsgögnum kom í ljós að óskýrðir fjármunir tengdir bankaviðskiptum hans hefðu verið 2.443.668 krónur.
Meðal óskýrðra viðskipta var einnar milljónar króna reiðufjárinnlögn á eigin reikning og kaup hans strax í kjölfarið á evrum upp á tæpa eina milljón íslenskra króna.
Skráðar tekjur mannsins hér á landi voru 775 þúsund króna greiðsla frá Félagsþjónustu Kópavogs og 320 þúsund krónur frá einkahlutafélögum. Þá fékk hann einnig tæpar 200 þúsund krónur í fjárhagsstuðning frá Reykjavíkurborg.
Við yfirheyrslur var maðurinn fremur tregur til svars. Hann kvaðst vera í daglegri neyslu og sagði efnin hafa átt að duga til eigin neyslu hér á landi í eitt til tvö ár og væri þau bæði ódýrari og í meiri gæðum á Spáni en hér á landi.
Hann vildi lítið tjá sig um óútskýrða fjármuni á bankareikningi sínum en kvaðst hafa unnið ólöglega hér á landi. Hann kvaðst hvorki muna eftir milljón króna innlögn né að hafa keypt evrur fyrir sömu upphæð.
Fyrir dóm kom lögreglufulltrúi sem stýrði rannsókn málsins. Sá taldi útilokað að svo mikið magn af kókaíni væri til eigin nota og nefndi að verðmæti þess á innlendum fíkniefnamarkaði væri yfir 10 milljón króna.
Álit dómsins var að framburður mannsins í heild hefði verið ótrúverðugur enda hefði hann verið reikull í frásögn og ólíkindablær verið yfir ýmsu í frásögn hans.
Þegar litið er til þess mikla magns af kókaíni sem hann flutti til landsins og þess að hann hafði hvorki fastan samastað né atvinnu á Íslandi við komu til landsins þykir hafið yfir skynsamlegan vafa að umrætt magn fíkniefna hafi verið flutt inn og ætlað til söludreifingar í ágóðaskyni hér á landi, eins og ákært var fyrir í málinu, að því er kemur fram í dóminum.
Maðurinn var dæmdur í 16 mánaða fangelsi. Til frádráttar þeirri refsingu kemur gæsluvarðhald hans frá 15. janúar.