Rikka segir að flæði og gott vinnupláss tróni á toppnum yfir mikilvægustu atriðin sem prýða gott eldhús. Einnig þurfi að huga að heildinni og karakter umhverfisins. „Við erum svo heppin að eldhúsið okkar er opið og í raun hjarta hússins en það er mikill kostur að geta tengt við vini og fjölskyldumeðlimi á meðan verið er að vinna í eldhúsinu,“ segir hún um eldhúsið sitt sem sé ákaflega mikilvægt í alla staði.

Grunnir skápar góðir

Gott skápapláss og skipulag í skápum sé oft vanmetið en sé gríðarlega mikilvægt þrátt fyrir að vera eitt af þeim atriðum sem fólk áttar sig ekki alveg á hversu mikilvægt er enda ber vel skipulagt eldhús það endilega ekki með sér fljótt á litið. „Það er fátt eins þreytandi eins og að liggja hálfur inni í skáp að leita að desilítramáli í draslinu. Ég er eiginlega komin á það að vera með grynnri skápa og færri hluti en geyma þá sparistell eða stærri hluti sem sjaldnar eru notaðir inni í geymslu,“ segir hún en stórir glerskápar hafa einnig verið vinsælir undanfarin misseri sem nýtast vel undir sparistellið..

Skiptir máli hvernig vaskurinn snýr

„Persónulega finnst mér svo kostur ef vaskur snýr að glugga, en það gefur manni tækifæri til að njóta útsýnisins og leyfa huganum að reika á meðan á uppvaskinu stendur,“ segir Rikka og bætir því við að slíkar stundir gefi ágætis tilefni til þess að staldra við í annríki dagsins og íhuga. Þetta er afskaplega áhugaverð pæling því margir leita einmitt í uppvask til að slaka á.

Róandi að saxa

Greinilegt er að matseld er Rikku ákaflega mikilvæg því ekki nóg með að hún hugleiði við uppvaskið heldur segist hún það afskaplega róandi að saxa niður grænmeti. Hún er því á því að sitt uppáhalds eldhúsáhald séu góðir hnífar en þá noti hún miklu fremur en matvinnsluvél. Ástæðan sé jafnframt sú að henni þyki það reyna á taugarnar að þrífa matvinnsluvélina.

„Góðir hnífar geta gert kraftaverk og þá nota ég mjög mikið, líklega út af því að mér finnst róandi að saxa niður grænmeti,“ segir hún og bætir við að litlar matvinnsluvélar eða tæki líkt og Nutribullet séu í uppáhaldi en þau sé auðvelt og einfalt að þrífa

Dreymir um tvo ofna

„Hið fullkomna eldhús fyrir mér er hlýlegt og aðgengilegt,“ segir hún aðspurð hvernig draumaeldhúsið sé. „Skipulag er mér líka ofarlega í huga þar sem það einfaldar umgengni og vinnu. Ég sé fyrir mér frekar dökkt eldhús, jafnvel út í blágrátt með bláum og kremlituðum, skrautlegum keramikflísum yfir veglegri eldavélinni. Þarna er hlýlegur viður, reyklitaðir glerskrautmunir og fallegar matreiðslubækur. Í eldhúsinu eru tveir ofnar þar sem ég get bakað marengs og jólasteikina á sama tíma. Góð og hlýleg lýsing í bland við kertaljós og kósýheit,“ segir hún og ljóst að hún er búin að hugsa þetta vel.

Á allt sem hana vantar

Aðspurð hvaða heimilistæki hana dreymi um að eignast segir hún þetta fremur erfiða spurningu, það væri þá einna helst mjólkurflóari frá Nespresso sem kæmist á óskalistann enda bráðsniðug græja fyrir alla kaffiunnendur. „Ég er svo óskaplega heppin að eiga allt sem mig vantar en ég yrði ánægð með flóarann,“ bætir hún við og ljóst er að hlustendur K100 eiga gott í vændum á næstunni enda má búast við stórskemmtilegum þáttum hjá þríeykinu ógurlega sem er öllu vant þegar kemur að fjölmiðlum.

Frétt af mbl.is

Rikka, Logi og Rúnar Freyr í nýjum morgunþætti