Hinar einu sönnu súkkulaðibitakökur

Nýbakaðar súkkulaðibitakökur svíkja engan.
Nýbakaðar súkkulaðibitakökur svíkja engan. mbl.is/Frederikke Wærens

Súkkulaðibitakökur eru eins og kanilsnúðar – allir elska þær. Snilldin við þessa uppskrift er sú að þú getur búið til deigið í dag og sett í frysti, þá áttu alltaf til deig ef þú færð gesti um helgina og hefur engan tíma til að standa í stórbakstri.

Hinar einu sönnu súkkulaðibitakökur (20 stórar eða 40 litlar)

  • 400 g smjör, við stofuhita
  • 300 g sykur
  • 250 g púðursykur
  • Korn úr 1 vanillustöng
  • 2 egg
  • 500 g hveiti
  • Salt á hnífsoddi
  • 2 tsk. lyftiduft
  • 200 g dökkir súkkulaði dropar
  • 2 dl salthnetur, hakkaðar
  • 1 poki Werthers-rjómakaramellur (eða aðrar sambærilegar), klipptar niður í litla bita

Aðferð:

  1. Þeytið saman smjör, sykur, púðursykur og vanillu þar til blandan verður ljós og létt í sér. Bætið við eggjum og þeytið. Blandið hveiti, lyftidufti og salti saman í skál og hrærið út í deigið. Að lokum koma súkkulaðidroparnir, hneturnar og karamellan út í með sleif.
  2. Formið kúlur með ískúluskeið og setjið deigið í frysti í 1 tíma.
  3. Hitið ofninn í 175° og leggið kúlurnar á bökunarpappír á bökunarplötu. Passið að leggja kúlurnar ekki of nálægt hver annarri því þær eiga eftir að fletjast út. Sirka 6 kúlur á hverja plötu. Bakið í 14-16 mínútur þar til þær eru orðnar gylltar og stökkar.
  4. Það þarf ekkert að klára allt deigið í einu því það má auðveldlega frysta og nota síðar þegar súkkulaðilöngunin kemur yfir mann.
Sniðugt er að nota ísskeið til að búa til kúlur ...
Sniðugt er að nota ísskeið til að búa til kúlur úr deiginu. mbl.is/Frederikke Wærens
mbl.is