Matur | mbl | 16.10.2018 | 11:39

Æðislegt pasta með beikoni og blómkáli

Það munu allir biðja um þennan rétt aftur í matinn. mbl.is/Spis Bedre

Það má alltaf bæta sig í pastaréttunum – finna upp á nýjum samsetningum þegar hluti af fjölskyldunni kvartar yfir að fá „alltaf það sama“ í matinn. Hér bjóðum við til leiks eina ofureinfalda en afar bragðgóða uppskrift að blómkálspasta með beikoni.

Auðvelt blómkálspasta (fyrir 4)

1 blómkálshaus
2 msk. ólífuolía
3 stór hvítlauksrif
½ tsk. chiliflögur, þurrkaðar
3 msk. tómatpúrra
1 dl vatn
250 g pasta
1 dós hakkaðir tómatar
50 g rúsínur
200 g beikonteningar
Steinselja
50 g furuhnetur

Aðferð:

Skerið blómkálið í litla bita og steikið upp úr olíu á pönnu í 3-4 mínútur. Bætið út í fínt söxuðum hvítlauk og chiliflögum og steikið áfram í 2-3 mínútur. Því næst kemur tómatpúrran og vatn og lokið sett á pönnuna. Leyfið blómkálinu að sjóða í 10 mínútur eða þar til það er orðið mjúkt.
Sjóðið pastað samkvæmt leiðbeiningum.
Bætið hökkuðum tómmötum og rúsínum út í blómkálsblönduna á pönnunni og sjóðið áfram undir lokinu í 5-6 mínútur þar til sósan þykknar.
Steikið beikonið á þurri pönnu og hakkið niður steinseljuna.
Blandið furuhnetum, steinselju og pastanu saman við blómkálsblönduna og dreifið beikoninu yfir.