Hér erum við með hinn fullkomna föstudags/janúar/má-leyfa-sér-en-samt-ekki rétt svona í janúarbyrjun. Það eru sérfræðingarnir hjá Einn, tveir og elda sem eiga þessa uppskrift og verði ykkur svo sannarlega að góðu.
Crispy kjúklingalundir með kartöflubátum
- 400 g kjúklingalundir
- 100 g panko-brauðrasp
- 1 egg
- 1 dl hveiti
- 300 g kartöflur
- 200 ml bbq-sósa
- 50 g klettasalat
- 1 tsk. hvítlauksduft
- ½ tsk. salt
- ½ tsk. pipar
- ½ tsk. rósmarínkrydd
Aðferð:
- Hitið ofninn í 200°C og blástur og hitið 2-3 msk. af olíu á pönnu. Pískið egg í skál og setjið brauðrasp ásamt kryddunum í aðra skál og hveiti í þriðju skálina.
- Skerið kartöflur í báta og setjið í eldfast mót ásamt 2-3 msk. af olíu. Kryddið með salti og pipar eftir smekk og bakið í 20-30 mínútur eða þar til stökkar.
- Veltið lundunum fyrst upp úr hveiti, síðan eggi og loks brauðrasp. Steikið lundirnar á vel heitri pönnu í um það bil mínútu á öllum hliðum eða þar til raspurinn hefur náð fallegum gylltum lit. Færið lundirnar þá í eldfast mót og inn í ofn í um það bil 20 mínútur.
- Berið lundirnar fram ásamt fersku salati og stökkum kartöflubátum.