Þessi kjúkingaréttur er algjör draumur því hann er alveg hreint sérstaklega ljúffengur þökk sé óvenjulegri marineringu. Það er Tinna Alavis sem á heiðurinn að þessari snilld en hún segir að hann sé bæði bragðmikill og dálítið sætur á bragðið.
Karamellukjúklingur Tinnu Alavis
- 3 kjúklingabringur
- 510 g BBQ-sósa
- 1 dós ananassafi
- 4 kramin hvítlauksrif
- 1 msk. rifið engifer
- 1 dl hunang
- 100 g púðursykur
- Íslenskt smjör til steikingar
Aðferð:
- Byrjið á því að skera bringurnar í passlega stóra bita. Takið næst fram stóra skál og útbúið marineringuna. Í henni er BBQ-sósa, ananassafi og hvítlauksrif ásamt engiferi, hunangi og púðursykri. Hrærið þessu vel saman og setjið kjúklinginn út í. Mér finnst best að láta kjúklinginn liggja í marineringunni í 2-4 klst. (í lokuðu íláti) inni í ísskáp fyrir eldun.
- Steikið kjúklinginn þar til hann byrjar að brúnast og orðinn karamelliseraður. Hellið sósunni þá yfir & leyfið þessu að malla í nokkrar mínútur til viðbótar á miðlungshita. Berið fram með t.d. salati & kartöflugratíni.
Hérna er uppskriftin að gratíninu sem ég var með.
- Kartöflur
- 250 ml rjómi
- 1 laukur
- 1 Óðals cheddar-ostur
Aðferð
- Hitið ofninn í 180°C (undir- og yfirhiti).
- Skrælið kartöflurnar, skerið þær í sneiðar og raðið í botninn á eldföstu móti.
- Saxið laukinn smátt & dreifið yfir kartöflurnar.
- Setjið cheddar-ostinn í matvinnsluvél þar til hann er orðinn að kurli & stráið yfir allt.
- Hellið rjómanum yfir.
- Eldið kartöflugratínið í 1 klst.
Gómsæt marineringin.
mbl.is/Tinna Alavis