Sælkerafiskréttur sem tikkar í öll box

Girnilegur þorskur, vafinn inn í parmaskinku með bökuðu grænmeti.
Girnilegur þorskur, vafinn inn í parmaskinku með bökuðu grænmeti. mbl.is/Columbus Leth

Það krefst ekki mikillar fyrirhafnar að elda nýjan fisk og því upplagt að græja það á annasömum dögum. Þessi uppskrift er einmitt þannig – fljótleg og góð. Hér bjóðum við upp á bakaðan þorsk, vafinn inn í parmaskinku með kúrbít og tómötum.

Ferskur og fljótlegur fiskréttur

  • 600 g þorskur
  • 4 sneiðar af parmaskinku 
  • 400 g kúrbítur
  • 300 g litlir tómatar (blandaðir litir)
  • 1 rauðlaukur
  • 2 msk. ólífuolía
  • 1 tsk. þurrkað timían
  • 1 tsk. þurrkað oregano
  • Salt og pipar
  • 1 dl grænmetiskraftur

Annað:

  • 400 g ferskt pasta
  • Steinselja

Aðferð:

  1. Hitið ofninn á 200°C.
  2. Skerið kúrbítinn í þykkar sneiðar og í fjóra hluta. Skerið tómata og lauk í báta. Veltið grænmetinu upp úr olíu og kryddið með timían, oregano, salti og pipar. Setjið í eldfast mót og hellið grænmetiskraftinum í botninn á fatinu. Setjið inn í ofn í 10 mínútur.
  3. Skiptið þorskinum upp í fjóra bita og kryddið með salti og pipar. Vefjið einni skinkusneið utan um hvert stykki.
  4. Takið fatið úr ofninum og raðið fiskinum ofan á grænmetið og setjið aftur inn í ofn í 15 mínútur. Eða þar til skinkan er orðin stökk og fiskurinn tilbúinn.
  5. Sjóðið pastað samkvæmt leiðbeiningum.
  6. Saxið steinselju og stráið yfir fiskréttinn og berið fram með fersku pasta.
Thinkstock
mbl.is