Matur | mbl | 9.12.2019 | 15:40

Beikon- og rjómalasagna Frikka Dórs

Frikka Dór er margt til lista lagt og nú kennir hann fólki hvernig á að elda frábæran mat. Eggert Jóhannesson

Hinn eini sanni Friðrik Dór lætur ekki sitt eftir liggja fyrir jólin og hefur gefið út bókina Léttir réttir Frikka. Þar gefur að líta úrval frábærra uppskrifta sem eru sérstaklega ætlaðar þeim sem eru að stíga sín fyrstu skref í eldhúsinu. Ekki svo að skilja að þær séu ekki fyrir meistarana líka en mikið var lagt í að hafa allar leiðbeiningar eins skýrar og einfaldar og kostur var auk þess sem Friðrik segir að góður matur þurfi hreint ekki að vera flókinn.

Við gætum ekki verið meira sammála og deilum hér uppskrift að lasagna sem enginn fær staðist.

BEIKON- OG RJÓMALASAGNA

Fyrir 3–4

Undirbúningstími: 10 mínútur

Eldunartími: 50 mínútur

HRÁEFNI

500 g nautahakk
1 pakki lasagnaplötur (sem þarf ekki að sjóða)
1 pakki beikon (um 170 g)
200 ml matreiðslurjómi
150 g parmesanostur
200 g rifinn ostur
250 g rjómaostur
1 laukur
3 hvítlauksgeirar
800 ml pastasósa (til dæmis með basilíku og hvítlauk)
70 g tómatpúrra
1 tsk. oregano
2 tsk. ítölsk hvítlauksblanda eða hvítlauksduft
ólífuolía
salt eftir smekk

AÐFERÐ

1. Hitaðu pönnuna á rúmlega meðalháum hita.

2. Skerðu beikon, lauk og hvítlauksgeira smátt.

3. Settu ólífuolíu á pönnuna og steiktu beikonbitana þar til þeir verða fallega brúnir.

4. Bættu lauknum og hvítlauknum út á pönnuna. Steiktu laukinn í um tvær mínútur eða þar til hann er við það að verða glær.

5. Bættu hakki við og steiktu þar til það er orðið fallega brúnt í gegn.

6. Bættu pastasósu, tómatpúrru, hvítlauksblöndu, salti og oregano út á pönnuna og blandaðu saman.

7. Leyfðu hakkblöndunni að malla í 10 mínútur.

8. Bættu matreiðslurjóma við og leyfðu að steikjast í 5-10 mínútur í viðbót.

9. Á meðan þú bíður skaltu taka til eldfast mót, hita ofninn í 180°C og stilla á blástur.

10. Rífðu parmesanost niður með rifjárni og settu til hliðar.

11. Settu fjórðung hakkblöndunnar í eldfasta mótið og dreifðu vel.

12. Stráðu þunnu lagi af parmesanosti og rifnum osti yfir hakkblönduna.

13. Smyrðu nú pastaplöturnar með rjómaosti og raðaðu í eldfasta mótið.

14. Endurtaktu skref 11-13 tvisvar í viðbót.

15. Eftir að þriðja laginu af pastaplötunum hefur verið komið fyrir í eldfasta mótinu skaltu setja seinasta fjórðung hakksins ofan á og strá þykku lagi af osti yfir.

16. Settu í ofn í 10-20 mínútur eða þar til osturinn er bráðinn og farinn að brúnast og pastaplöturnar orðnar mjúkar.

GÓÐ RÁÐ

Gott er að nota lasagnaplötur sem ekki þarf að sjóða áður. Þannig er auðveldara að smyrja þær. Ef notast er við lasagnaplötur sem þarf að sjóða skaltu fara eftir leiðbeiningum á umbúðunum og sjóða tveimur mínútum skemur en umbúðirnar segja til um. Þannig er komið í veg fyrir að plöturnar ofeldist í ofninum.
Varstu að salta lasagnað of mikið þar sem parmesanosturinn bætir við seltu.