Matur | mbl | 10.12.2020 | 11:33

Læknirinn bauð upp á rándýra sósu

Eggert Jóhannesson

Jólamatarblað matarvefs mbl.is og Hagkaups er komið út og þar kennir ýmissa grasa. Læknirinn í eldhúsinu fer meðal annars á kostum með forláta krónhirti sem hann eldar á sinn einstaka hátt. Með hirtinum er hann svo með sósu sem við leyfum okkur að fullyrða að sé dýrasta sósa sem birst hefur á matarvef mbl.is en í henni er meðal annars að finna 500 ml af Campofiorin rauðvíni og hálft kíló af hreindýrahakki. Þó má nota nautahakk og villibráðarkraft hafi menn ekki aðgang að hreindýrahakki.

Blaðið í heild sinni má skoða HÉR.

Kristinn Magnússon

Campofiorin-rauðvínssósa

500 g nautahakk (eða hreindýrahakk en þá þarf ekki kraft)
villibráðarkraftur
½ gulur laukur
2 hvítlauksrif
smjör/olía til steikingar
500 ml Campofiorin-rauðvín (auðvitað má nota hvaða rauðvín sem er)
1 greinar af timían
500 ml kjúklingasoð
2 msk. smjör
salt og pipar

Aðferð:

Steikið hakk og lauk í smjöri þar til það fær á sig fallega brúnan lit. Saltið og piprið.
Undir lok steikingarinnar á kjötinu og lauknum bætið þið smátt skornum hvítlauk saman við og látið steikjast í nokkrar mínútur.
Gætið þess að brenna ekki laukinn eða hvítlaukinn.
Bætið rauðvíninu saman við og sjóðið upp ásamt timíangreininni – og sjóðið niður þannig að það séu ekki nema kannski 50-70 ml af víni eftir á pönnunni.
Bætið næst kjúklingasoðinu saman við og sjóðið upp og síðan niður um rúmlega helming.
Síið sósuna í annan pott og bætið smjöri, litlu í senn, saman við á meðan þið hrærið jafnt og þétt. Þannig fær sósan á sig fallegan gljáa og aukna þykkt.
Saltið og piprið eftir smekk.