Matur | mbl | 12.1.2021 | 11:01

Góður og einfaldur fiskréttur með dúndursósu og hvítkáli

Ljósmynd/Hanna

Matarbloggarinn og keramiksnillingurinn Hanna heldur áfram að elda dýrindis mat í sínum sérhönnuðu pottum sem eru algjör snilld. Hér er hún með fiskrétt sem ætti að slá í gegn á hverju heimili.

„Það er alltaf vinsælt að elda eitthvað sem er bæði einfalt og gott. Þessi fiskréttur gerir litlar kröfur en rennur ljúflega niður – eiginlega er hann alveg sérstaklega bragðgóður. Þetta er einn af þeim réttum sem ég bý til í pottunum mínum en það má líka nota annað sem þolir að fara í heitan ofn. Ég elda fiskinn með lokinu á en þannig verður uppgufunin lítil og minna vökvatap en eldunartíminn er aðeins lengri fyrir vikið.

Ath. Eldunartíminn ræðst bæði af þykkt fiskbitanna og hvort rétturinn er eldaður með loki eða ekki. Ef bitarnir eru þykkir þarf að gera ráð fyrir lengri eldunartíma. Hægt er að nota annað grænmeti en ég mæli með hvítkáli – það gefur skemmtilega útkomu.“

Góður og einfaldur fiskréttur með dúndursósu og hvítkáli

800 g – 1kg fiskur t.d. þorskhnakki – skorinn í bita
sítrónupipar frá Pottagöldrum
toskan frá Kryddhúsinu
kummín – malað
kóríander
túrmerik
1 tsk saltflögur
grænmeti – til dæmis brokkólí og blómkál
hvítkál – skorið í þunnar ræmur
sósa
3 dl mascarponeostur
2-2½ dl matreiðslurjómi
karrí
túrmerik

Aðferð:

Ofninn hitaður í 180°C (yfir- og undirhiti).
Fiskurinn skorinn í bita og settur í pottinn (fatið). Kryddi stráð yfir (sjá myndband).
Bitum af grænmeti dreift yfir.
Sósan gerð: Mascarponesostur settur í skál ásamt matreiðslurjóma – hrært saman. Karríi og túrmeriki bætt við (sjá myndband) – hrært saman og hellt yfir fiskinn.
Hvítkálsræmum stráð yfir.
Lokið sett á pottinn og eldað í ofinunum í 35-40 mínútur. Ath. ef lokið er ekki notað er eldunartíminn styttri en um leið getur fiskrétturinn orðið aðeins þurrari (meiri uppgufun).

Meðlæti: Ferskt salat og hrísgrjón