Það nær enginn árangri með því að sitja á sundlaugarbakkanum og drekka kokteila allan daginn. Fjármálamaðurinn Tom Corley, höfundur bókarinnar Change Your Habits Change Your Life, komst að því hvað einkennir venjur fólks sem hefur náð góðum árangri.
Corley gerði könnun meðal fjölda fólks, fólks sem hafði aðallega skapað sinn auð sjálft, og bar saman við fólk með lægri tekjur. CNBC greindi frá niðurstöðum hans um hvað farsæla fólkið átti sameiginlegt.
Vakna snemma
Nærri helmingur þeirra milljarðamæringa sem sköpuðu sinn auð sjálfir í könnun Corley fór á fætur að minnsta kosti þremur tímum áður en hinn hefðbundni vinnudagur hófst. Tímann nýttu þeir til þess að sinna persónulegum málum, skipuleggja daginn eða fara á æfingu.
Lesa
88 prósent þeirra ríku einstaklinga sem Corley kannaði sögðust eyða að minnsta kosti hálftíma á dag í að lesa. Ekki voru neinar spennubækur á bókalistanum heldur las fólk til þess að læra eða bæta sig. Bækurnar voru ævisögur, sagnfræðibækur eða sjálfshjálparbækur.
Hugsa
Öll hugsum við en það eru ekki allir sem gefa sér tíma til þess að einbeita sér að hugsunum sínum og vinna úr því sem er í gangi í lífinu þeirra eins og fólkið í könnun Corley gerði. „Þeir ríku hafa tilhneigingu til að hugsa einir, á morgnana og í að minnsta kosti 15 mínútur á hverjum degi,“ skrifaði Corley.
Setja hreyfingu í forgang
Margir segjast ekki hafa tíma til þess að æfa en hanga svo í tölvunni í marga klukkutíma á dag. 76 prósent af fólkinu í könnun Corley koma fyrir hálftíma á hreyfingu á dag.
Vinna hart að markmiðum sínum
Corley segir að 80 prósent þeirra ríku ætli sér það og það tekst. Hann segir mikinn meirihluta vera með markmiðin á heilanum, markmið til bæði skemmri og lengri tíma.
Sofa nóg
89 prósent af farsæla fólkinu sem Corley kannaði svaf í sjö til átta tíma á hverri nóttu. Það þarf því ekki endilega að vaka allar nætur til þess að ná árangri en Corley segir svefn nauðsynlegan til að ná árangri.
Eyða ekki tíma sínum í óþarfa
Peningarnir skipta ekki öllu fyrir þetta fólk, tíminn gerir það líka. Fólkið er meðvitað um hvað það ver tíma sínum í.