Á dögunum greindi Vogue frá því að raunveruleikastjarnan Kim Kardashian West ætlaði að ná sér í lögmannsréttindi eftir aðeins þrjú ár. Kardashian West verður þó ekki eina löglærða stjarnan þegar hún lýkur námi. Kemur fram á vef tískutímaritsins að nokkrar stjörnur hafa lært lögfræði á námsárum sínum. Ólíkt hinum stjörnunum heillaðist raunveruleikastjarnan mun seinna á lífsleiðinni af lögfræðinni og möguleikum hennar.
Gemma Chan
Stjarnan úr Crazy Rich Asians lærði lögfræði í Worcester-háskólanum á Englandi og fékk starf á lögfræðistofu í London sem hún tók ekki þar sem hún komst inn í leiklistarskóla.
Gerard Butler
Íslandsvinurinn stundaði lögfræðinám við lagadeild Glasgow-háskóla auk þess sem hann var var í starfsnámi í Edinborg. Hann flutti seinna til London og sló í gegn sem leikari.
Andrea Bocelli
Blindi óperusöngvarinn stundaði lögfræði í háskólanum í Písa og starfaði sem lögfræðingur í eitt ár áður en hann sneri sér að tónlistinni.
Jerry Springer
Spjallþáttastjórnandinn var meðeigandi í lögfræðistofu í Ohio á árunum 1973 til 1985.
Rebel Wilson
Ástralska grínleikkonan útskrifaðist bæði með BA-gráðu í leikhúsfræðum og lögfræði árið 2000.
John Cleese
Leikarinn lék ekki bara í Monty Python og auglýsingu fyrir Kaupþing hann náði sér líka í lögfræðigráðu árið 1963.