Þórunn Ívarsdóttir áhrifavaldur og Harry Sampsted fluttu ásamt dóttur sinni, Eriku, í Urriðaholt í Garðabæ í febrúar 2018. Íbúðin var ný þegar parið flutti inn og segir Þórunn fjölskyldunni líða ákaflega vel í hverfinu.

„Ég er sjálf úr Garðabæ og foreldrar mínir voru búnir að festa kaup á íbúð í götunni þegar við kolféllum fyrir hverfinu.“

Hún segir jafnframt nálægðina við náttúruna mikinn kost.

„Ég fer mikið út með Eriku í göngutúra og ég er alltaf að uppgötva eitthvað nýtt. Það er það skemmtilega við hverfi sem er að byggjast upp. Ég lendi mjög oft á opnu húsi í hverfinu og tek hring.“

Þórunn segir svolítið erfitt að lýsa stílnum á heimilinu, þó séu hlýja og einfaldleiki kannski helst áberandi.

Spurð að hverju sé mikilvægast að huga við innréttingu heimilisins segist hún kjósa einfaldleika.

„Núna er allt svolítið strípað af persónuleika út af litlum puttum sem fara í allt og yfirleitt er mikið meira um skraut og dúllerí. Ég er búin að þurfa að grisja vel og sendi meira að segja plöntu í fóstur í næsta hús,“ útskýrir Þórunn sem kaupir mikið inn á heimilið í Dimm, Snúrunni, Epal og IKEA.

Hún segir jafnframt nýja borðstofustóla á óskalistanum.

„Mig dreymir um wishbone-stólana, svarta með ljósri sessu. Þarf bara að byrja að safna.“ Hvað varðar eftirlætisstaði á heimilinu segist Þórunn eyða miklum tíma í hægindastólnum í stofunni. „Þegar unginn er sofnaður er ótrúlega gott að slaka vel á yfir sjónvarpinu.“

Þá segir hún fjölskylduna gjarnan verja góðviðrisdögum saman á rúmgóða sólpallinum sem þau byggðu síðasta sumar.