Þess vegna áttu að borða chia-fræ

Chia fræ eru næringarrík og flokkast sem ofurfæða. En hvers vegna eigum við að borða þessi agnarsmáu fræ? Guðrún Bergmann skrifar um chia-fræ í nýjasta pistli sínum.

Hér eru nokkur önnur atriði sem gera það að verkum að gott er að bæta þessari ofurfæðu út í matinn sinn að minnsta kosti nokkrum sinnum í viku, hvort sem fræin eru heil eða mulin, því chia-fræin eru:

Næringarrík: Í chia-fræjum er bæði nóg af kalki og prótíni fyrir vefi líkamans. Í þeim er líka boron, sem hjálpar líkamanum að nýta sér kalkið. Næringarefni þeirra efla einnig starfsemi heilans.
Elska vatn: Fræin geta dregið í sig allt að 10-12 sinni þyngd sína af vatni. Þú getur gert tilraun með þetta með því að setja eina matskeið af chia-fræjum í bolla af vatni og hræra saman. Bíddu svo í nokkra tíma og sjáðu hvað gerist. Þegar fræin eru komin innan í líkama þinn hjálpa þau upp á vatnsbúskap hans og viðhalda electrolýtum í líkamsvökva þínum.
Auðveld í meltingu: Hýðið utan á chia-fræjunum brotnar auðveldlega niður, jafnvel þótt þau séu borðuð í heilu lagi. Að þessu leyti eru þau betri en hörfræ, sem þarf að mylja svo þau meltist. Annars renna þau bara í gegnum líkamann í heilu lagi.
Samþjöppuð næring: Ef þú fengir bara að borða einn bolla af fæðu á dag í nokkra daga, þá væru chia-fræin kjörin fæða. Næringargildi þeirra er ótrúlega mikið.
Mild á bragðið: Ólíkt mörgum öðrum fræjum þá er bragðið af chia-fræjunum milt og gerir það að verkum að auðvelt er að setja fræin út í sósur, búst, brauð, búðinga og nánast hvað sem er. Fræin eiga ekki eftir að auka við bragð fæðunnar, bara næringargildi hennar.
Orkurík: Bandaríski heilsufrömuðurinn Paul Bragg gerði tilraun á úthaldi með hópi göngufélaga sinna. Hópnum var skipt í tvennt, öðrum sem bara borðaði chia-fræ og hinum sem mátti borða hvað sem var. Hópurinn sem borðaði bara chia-fræ lauk gönguferðinni fjórum tímum og tuttugu og sjö mínútum á undan hinum, en margir úr hinum hópnum náðu ekki að ljúka göngunni.

Hér kemur svo uppskrift að góðri chia-skúffuköku - eða sælgætisferningum:

Ef þú átt ekki allt sem er í uppskriftinni, þá eru tillögur að öðru sem hægt er að nota innan sviga.

½ bolli möndlusmjör eða jarðhnetusmjör
½ bolli hunang
½ bolli sneiddar eða muldar möndlur
½ bolli rúsínur
½ bolli chia-fræ
½ bolli kókosflögur (ósætar)
½ bolli graskersfræ
½ bolli þurrkuð trönuber (eða bláber)
½ bolli hafraflögur (eða sólblómafræ)
½ bolli hampfræ (eða sesamfræ)
Örlítið af salti - best ef það er himalayasalt

Aðferð:
Settu hnetusmjörið og hunangið í pott og HITAÐU það þar til það bráðnar saman. Blandaðu vel. Bættu ÖLLUM þurrefnunum saman við og hrærðu vel. Þrýstu blöndunni  í botninn á ferköntuðu formi. Notaðu fingurna til að þrýsta blöndunni þétt í formið. Hafðu formið í ísskápnum í nokkra klukkutíma svo blandan stífni. Skerðu í ferninga og njóttu heilsusamlegs sælgætis.

HÉR er hægt lesa pistil Guðrúnar í heild sinni.

• 1 blogg um fréttina

Bloggað um fréttina

• Axel Jóhann Hallgrímsson: Chia fræ - áttunda undur veraldar