10 atriði sem gera það auðveldara að vakna

Það er sjaldnar erfiðara að vakna en akkúrat í desember og janúar og margir sem mæta hálfsofandi til vinnu. Það er ansi freistandi að ýta á „blunda“ aftur og aftur þegar klukkan hringir eða fara aftur upp í rúm þegar búið er að ljúka fyrstu klósettferð dagsins. Fólk ætti ekki að tapa á því að fara eftir nokkrum einföldum ráðum sem má finna á vefnum MyDomaine, kannski auðveldar það morgunverkin hjá einhverjum. 

Ekki gera neitt annað en að sofa í rúminu

Það getur haft ruglandi áhrif á líkamann ef fólk er vant því að horfa á sjónvarpið og vinna eða læra í tölvunni uppi í rúmi. 

Kveiktu á ljósinu

Það er fátt verra en að kveikja ljósin á morgnana en fátt skilar betri árangri. Það er erfiðara að sofna aftur þegar búið er að kveikja ljósin. 

Búðu um rúmið

Byrjaðu daginn á því að búa um rúmið. Það er góð tilfinning að klára eitthvað á morgnana og það er ekki jafn freistandi að hoppa upp í vel um búið rúm. 

Ekki ýta á „blunda“

Ef þú getur ekki komist hjá því að ýta á „blunda“ er líka gott ráð að taka upp símann þegar þú ýtir á takkann og kíkja á samfélagsmiðla. Þegar vekjaraklukkan hringir næst ertu líklega búin(n) að skrolla aðeins á Facebook og Instagram og tilbúnari í að mæta deginum. 

Áttu erfitt með að vakna á morgnana. Getty images

Vakna við skemmtilegt lag

Ekki nota alltaf sama gamla tóninn fyrir vekjaraklukkuna, það fær fólk bara til að orga og slökkva á vekjaraklukkunni. Prófaðu að setja eitthvert skemmtilegt lag í staðinn eða að minnsta kosti ekki jafn pirrandi tón. 

Verðlaunaðu þig á morgnana

Hvort sem það er súkkulaðið úr dagatalinu eða góður kaffibolli. 

Vaknaðu á sama tíma á hverjum degi

Það getur verið auðveldara að vakna klukkan átta á virkum dögum ef fólk vaknar klukkan átta um helgar. Ekki koma virku morgnunum í rugl með því að sofa til hádegis um helgar. 

Fáður þér frískt loft

Andaðu að þér fersku lofti á morgnana. Ef þú átt ekki hund sem dregur þig út í göngutúr á morgnana er líka hægt að opna bara svaladyrnar og anda að sér frískandi vetrarloftinu. 

Drekktu stórt glas af vatni

Það hefur jákvæð áhrif á mann að drekka stórt glas af vatni á morgnana, ekki fara beint í kaffið. Eftir vatnsglasið er kannski í lagi að fá sér einn góðan kaffibolla. 

Mættu á morgnana

Ef þú átt ekki að mæta í vinnu klukkan átta eða níu eins og flest fólk er gott að vera með skipulagða dagskrá á morgnana. Það fær þig til að rífa þig upp úr rúminu enda óþarfi að fresta öllu fram eftir degi. 

• Blogga um frétt