Pabbakroppar slá í gegn í heimsfaraldrinum

Um 75% af einhleypu fólki hrífst helst af pabbakroppum (e. dad bod) samkvæmt nýlegri könnun Dating.com. Alls svöruðu yfir 2.000 manns könnuninni. 

Pabbakroppurinn er orð notað yfir líkamsgerð karla á miðjum aldri sem eru heldur mjúkir um sig miðja. Orðið kom fyrst fram á sjónarsviðið árið 2015 þegar myndir náðust af stórleikaranum Leonardo DiCaprio berum að ofan á ströndinni. Þá þótti DiCaprio hafa bætt helst til mikið á sig en líkamsgerðin hefur verið á rífandi siglingu síðastliðin sex ár. 

„Einhleypir eru byrjaðir að kunna að meta fleiri líkamsgerðir þar sem þeir þekkja hversu erfitt það er að halda sér í formi í heimsfaraldrinum,“ sagði Maria Sullivan í viðtali við Insider um niðurstöðu könnunarinnar. 

„Flottir líkamar í góðu formi hafa lengi verið ofarlega á lista fyrir tilvonandi maka fólks. En notendur okkar hafa sannað að það er ekki alltaf raunhæft í raunveruleikanum,“ sagði Sullivan. 

Þótt heimsfaraldurinn hafi eflaust eitthvað að gera með þessar niðurstöður hefur pabbakroppurinn verið vinsæll lengur. Í könnun hjá Planet Fitness árið 2019 sagði 61% svarenda að sér þætti pabbakroppurinn kynþokkafullur. Það eru um 10% fleiri en árið áður. 

„Í kvimyndum sjáum við oft Barbie- og Ken-líkamsgerðir og það gefur okkur þá hugmynd að við verðum að líta eins út til að finna ástina. Við staðfestum það með gleði að þannig virkar það ekki í raunveruleikanum. Sama hvernig líkamsgerð þín er, þá er sálufélagi þinn þarna úti,“ sagði Sullivan.

• Blogga um frétt