Ein fallegasta íbúð landsins er komin á sölu. Um er að ræða hæð Unnar Aspar Stefánsdóttur og Björns Thors. Stækkandi fjölskylda kallar á öðruvísi húsnæði en hjónin eignuðust tvíbura á þessu ári en fyrir áttu þau tvö börn.
Hæð Unnar Aspar og Björns stendur við eina fallegustu götu Reykjavíkur. Hvítir stíflakkaðir gólflistar, gluggalistar og loftlistar setja svip á íbúðina. Eldhúsið er með hvítri sprautulakkaðri innréttingu og er það í herbergi við hliðina á stofunni. Á íbúðinni er parket með fiskibeinamunstri og er íbúðin máluð í mildum og fallegum litum.
Heimilið sjálft er smekklega innréttað á látlausan og vandaðan hátt eins og sést á myndunum. Svo má ekki gleyma því að í húsinu eru tvær aðrar íbúðir og hefur sú sem hér skrifar heimildir fyrir því að varla sé hægt að eignast betri nágranna.