Það er auðvelt að gera mistök þegar maður innréttar heimili sitt. Á meðan það er kannski í flóknara lagi að skipta út ljótu gólfefni fyrir nýtt þá er annað sem er auðveldara að laga eins og Mydomaine fór yfir.
Listaverk
Það er ekki flókið að endurskipuleggja listaverkin á veggjunum. Margir eiga það nefnilega til að hengja verkin of hátt. Svo er líka ekki óalgengt að fólk haldi að stór verk eigi bara heima í stórum rýmum en stóru verkin koma líka mjög vel út í minni rýmum.
Lýsing
Það tekur ekki langan tíma að stinga einum lampa í samband en það getur þó breytt heilmiklu. Oft og tíðum er bara loftljós í herbergjum en lykillinn á bak við rými sem bera af er fjölbreytt lýsing, loftljós, borðlampar og standlampar.
Uppröðun
Það að raða öllum húsgögnum upp að veggjum er ekki málið og auðvelt að laga þau mistök. Fólk ætti að prófa að raða húsgögnunum upp á nýtt enda getur það gjörbreytt herbergjum.
Forstofan
Forstofan er það sem tekur á móti fólki þegar það kemur inn á heimili. Minnka ætti drasl í forstofunni með fallegum munum sem hægt er að geyma smærri hluti og fatnað í þannig að lítið beri á. Opnar hillur ætti að nota til þess að fegra heimilið ekki til að geyma lykla, húfur og gamlan gluggapóst.
Sófinn
Púðarnir í sófanum geta gert mikið fyrir heimilið. Þrír til fimm púðar eru nóg fyrir venjulegan sófa. Gamlir og mikið notaðir púðar gera ekki mikið fyrir stofuna. Það þarf þó ekki að kaupa nýja heldur getur það gert heilmikið að slá púðana, snúa þeim við og raða þeim upp á nýtt.