Í dag kom á sölu áhugaverð eign í steinhúsi við Mímisveg í Reykjavík. Húsið var byggt árið 1930 af Valdimari Runólfssyni og er einstaklega virðulegt. Framhlið hússins er tilkomumikil og má staðhæfa að þessi eign sé ein af perlum Þingholtanna.

Í íbúðinni, sem er á 2. hæð hússins, er hátt til lofts og gluggarnir eru fallegir og kasta birtu frá þremur hliðum íbúðarinnar. Framhlið hússins er eftir myndum að dæma mjög tilkomumikil. 

Mímisvegur er eins og flestir kannast við með fjölmörgum áhugaverðum húsum, tignarlegum görðum og hávöxnum trjám. Gatan liggur í sveig frá Barónsstíg að Skólavörðuholti. Um götuna segir Guðjón Friðriksson sagnfræðingur í bók sinni Indæla Reykjavík: „Mímisvegur dregur nafn sitt af Mími þeim sem Mímisbrunnur (brunnur viskunnar) var kenndur við. Nafnið var sérstaklega valið með tilliti til þess að gatan skyldi tengja saman byggingar Háskóla Íslands í fyrirhugaðri háborg íslenskrar menningar í Skólavörðuholti og Landsspítalann.“

Hér er hægt að sjá íbúðina.