Upp á síðkastið hefur blár litur verið ákaflega vinsæll en núna eru gráir og grænir tónar að verða vinsælli ásamt brúnum, beige-lituðum og pastel-bleikum. Mjúkur gulur og vínrauður eru líka að koma sterkir inn. Þeir eru þó ekki notaðir saman. Þú verður að velja annaðhvort.

Það skiptir máli að mála þannig að liturinn sé látlaus grunnur. Málningin á ekki á æpa á okkur og við eigum ekki að fá innilokunarkennd. Ef þú færð innilokunarkennd þá er liturinn of dökkur. Ef það er hátt til lofts og vítt til veggja þola rými betur dekkri liti en ef um mjög smá rými er að ræða. Fólk er oft að velta fyrir sér hvort það eigi að hafa rönd meðfram loftinu eða ekki. Ef þú vilt mála í anda nútímafólks þá málar þú loftið og veggina í sama lit. Nú ef engin leið er að mála loftið í sama lit á ekki að vera lína meðfram loftinu. Það virðist hærra til lofts ef það er engin lína.

Blæbrigði skipta máli þegar við veljum liti. Hver hefur ekki lent í því að vera búin/n að kaupa 10 lítra af málningu og tónninn er með aðeins of bláum undirtón eða eitthvað slíkt. Þess vegna skiptir máli að kaupa litlar prufur og prófa sig áfram þegar litur er valinn. Ekki bara apa upp eftir næsta manni.

Og ef þú vilt vera sjúklega mikið með allt á hreinu þá málar þú gólflistana í sama lit og veggurinn þannig að það skapist tær og falleg heildarmynd.