Við Fellahvarf í Kópavogi stendur ákaflega vel heppnuð og falleg íbúð með einstöku útsýni yfir Elliðavatn. Íbúðin er 120 fm og stendur í húsi sem byggt var 2005.
Eldhús og stofa eru samliggjandi í opnu rými. Í eldhúsinu er sprautulökkuð hvít innrétting frá HTH með granít-klæddri eyju. Eldhúsið er stílhreint og vel skipulagt með ríflegu skápaplássi.
Fallegt borðstofuborð tengir saman eldhúsið og stofuna og setur Secto-ljósið úr Módern svip sinn á rýmið. Það skapar hlýleika og mýkt, ekki síst þegar skyggja tekur.
Íbúðin er máluð í mjúkum litum, ljósgráum og örlítið dekkri gráum. Litirnir passa vel við eikar-parketið sem er á gólfinu.